History

Dezembrache 19ver, 1961 hea disa Goy svotontr zalem. Purtugezanchi hukum’xay sompli ani 450 vorsam kuxik urlolem Goy Bharat matache vengent ailem. Punn Goy mukt zaina fuddench Goychea somazant motti futt poddli. Hi futt mhunttlear kaim Goykarank Goy Maharashtrant vilin kelolem ani Goychi rajbhas Moratthi zaloli zai asli zalear niz Goykarank Goy vegllo prant aslolo ani Goychi rajbhas Konknni zaloli zai asli. Hea gombhir proxnnank lagon Goycho somaz don bhagamni futton ghelo.

‘Opinion Poll’

Goy Maharashtrant vilin zaunchem vo asa toxench Songh Prodesh (Union Territory) urcho hacher Goykaranchem mot gheunche khatir Janerache 16ver, 1967 vorsa ‘Opinion Poll’ ghoddoun haddlo. Donuch proxn: Goy Maharashtran vilin zalolem zai vo Goy Songh Prodesh urlolo zai. Hea itihasik ‘Opinion Poll’-an niz Goykar jikle ani Goy Songh Prodeshuch urcho mhunnon Goykaramni sonnsonnit nirnnoy ghetlo. Goy Maharashtran vilin korpachem vattailem. Niz Goykaramni khuxalkayen hem vhodd zoit monoilem. ‘Opinion Poll’-acho nikall Goyank Vegllo prant ( Separate State) melloun ghevpak poilem panvoll zaun aslem.

Rajbhas

Goy vegllo prant zatolo zalear Goychi rajbhas khoinchi tem spoxtt korpachi goroz asli. Porot anik ek pavtt Goykaram modhem ubhi futt poddli.Todde Goykar, je ‘Opinion Poll’-an harlole, te apli avoy bhas Maratthi mhunnonk lagle ani tich bhas rajbhas zaupak mhunn magnni keli. Niz Goykar zannim ‘Opinion Poll’-an Goy Maharashtran vilin korpachem vattailolem te Goykar Goychi rajbhas Konknni zaunk zai mhunn ‘demand’ kelo. Konknni bhas rajbhas korchi mhunn Goyant vhoddli ani rogot valloupi chollvoll zali. Sat (7) Konknni bhaxeche pattlaudar he chollvollint sonvsarak ontorle. Akhem Goy bondh zalem. Goy ulponk laglem. Anik kosloch upay na zaun Febrerache 4 tarker, 1987 hea disa Congress sorkaran Goy Rajbhas Kaido pas kelo.Tea kaidea pormonnem Konknni bhas Goychi rajbhas zali ani Maratthi bhaxekui Goychea rajkarbaran sthan dilem. Vhoddantli vhodd chollvoll korun Konknni bhaxek rajbhas keli mhunn Goykar khuxal zalet kai? Na! Urfattench jea disa Rajbhas Kaido pas zalo teach Goychea Konknni somaza modhem ubhi futt poddli.

‘Betrayal of 20th Century’

Akhe chollvollent xekddeamni jahir sobha ghoddoun haddloleo ani sogllea sobhamni Konknni bhaxek rajbhas korpak zai mhunn soglle fuddari uloitale. Hea fuddaream modhem Devnagori lipiche pattlaudar toxech Romi lipiche pattlauddar asle. Chukon poriant konnenuch Konknni bhas Devnagori lipin aschi vo Romi lipin aschi hacho kednanch ulekh kelo na kiteak soglle ekvottan Konknni bhaxe khatir vavurtale khoinchech eke lipi khatir nhoi. Punn amchea durdoivan jednam Rajbhas Kaido pas zalo tea kaideant ek ‘definition’ ghatlem – ‘Konkani means Konkani Language written in Devnagori script’. Dusrea utramni Konknni bhas ji Romi lipint boroita te bhaxek kaidean kainch sthan dilem na, tika bhair uddoili. Romi lipint Konknni bhas vachpeank ani boroitoleank sarke fottoile.

He chollvollechem boll mhunttlear Romi lipintle Konknniche pattlaudar. Jahir sobhank hozaramni lok ekttaim zatalo tantuntlo 95% lok Romi lipintle Konknniche mogi astale. Sat (7) tornatteanche he chollvollent jiv ghele te satui Romi lipintle Konknniche bhokt asle. Akhe chollvollint konnenuch lipi vixim ek shobd kaddlo na. Romi lipichem boll itlem aslem ki zortea vellar konnench amkam Konknni bhas fokot Romi lipint zai mhunttloli zalear Devnagori lipiche pattlaudar Tsunami yeun lotton veta toxe lotton vetole asle. Itleim ason poriant, konnakuch na kolltam ‘Konkani means Konkani language written in Devnagori script’ hem ‘definition’ Rajbhas Kaideant ghatlem ani Romi lipintle Konknnichea bhoktancho visvasghat kelo. Te dharun kornnek hanv ‘Greatest Betrayal of 20th Century’ mhunnttam.

TSKK-chi boska

Porvorim Goy aslolo Thomas Sthepens Konknni Kendr (TSKK) Konknnichi seva korche khatir sthaplolo. Hea kendrant somplolo Fr. Mathew Almeida ani Fr. Pratak Naik pott’ttiddkin Konknni bhaxecho vavr kortale. Hea kendrak lipiyamcho bhed-bhav matui lago naslo. Te sogllea lipyamni zoxe porim Devnagori, Romi, Kan’nad, adi Konknnichi seva ani udorgot kortale. Jednam Rajbhas kaido pas zalo ani tantun Devnagori lipintle Konknnik adhikrut sthan dilem tednam TSKK-k dislem ki Romi lipint Konknni boroita ani vachta tankam Devnagori lipint Konknni borounk vachunk proxikxonn diunchem mhunn. Hea hetun tannim Romi lipint Konknni boroupeanchi zomat apoili. Vhodde sonken Romi lipint Konknni boroupi thoim hajir zalole.

Fr. Mathew Almeida hannem yevkar dilea uprant oxem mhunttlem, “ Goy Raj Bhas Kaido pas zalo ani ami to soglleamni mandun ghetla…..” Fr. Mathew-an kitem sangpachem asa tem kobar zaunchench adhim somplolo Fr. Freddy J. da Costa hannem ek prosn kelo, “Konn sangta to kaido ami soglleamni mandun ghetla mhunn?” Hem aikona fuddem zonn eklo ulounk laglo ani ap-aplem mot diunk laglo. Bhasabhaxe velean ek sid’dh zalem ki thoim ekttaim zalolea Romi lipintlea boroinnaramni to kaido mandun gheunkuch naslo mhunn. Tea vellar Goyantlem Konknni bhaxechem khorem chitr Fr. Mathew Almeida ani Fr. Pratap Naik hanchea dolleam somor ailem. Romi lipintli Konknni morunk diunk zaina oxem soglleank dislem ani Romi lipintle Konknnichi seva korche khatir upai gheunk zai oso sur te bosken ailo. Romi lipintle Konknni bhaxechi seva korunk ek Akademi zai oxem soglleank dislem. Hi zomat Marsache 14ver, 1987 vorsa Jezuit House, Ponnje zali.

Romi bhoktanchi boska

Tea uprant Romi lipintle Konknnichea bhoktanchi Julay 17, 1988 hea disa Ponnjechea Institute Piedade ghorant anik ek zomat zali je zomatin Fr. Pratap Naik, Tomazinho Cardozo ani somplolo Fr. Freddy J. da Costa hannim Romi lipintle Konknni bhaxechi koxe poorim udorgot korum yeta hache vixim bariksannen mahiti dili. Oxem korpak ek Akademi sthapon korpachi goroz asa mhunn soglleank dislem ani he Akademichem nanv Dalgado Konknni Akademi aschem mhunn Fr. Pratap Naik sj hannem suchoilem. Fr. Pratap Naik hannem Mons. Sebastiao Rudolfo Dalgado hachea mhan karyachi hajir asloleank mahiti dili. Anik zaiti bhasabhas zalea uprant hi Dalgado Konknni Akademi koxi aschi tacher vichar korunk rokddich anik boska apoili.

DKA-chi Poili Somiti

Hi mhotvachi zomat Agostache 28ver, 1988 vorsa, mhunttlear 24 vorsam adim, Moddganvam Loyola iskolachea vosreant zali. Fr. Pratap Naik hannem Dalgado Konknni Akademin fuddarak koxim fuddlim panvlam marchim ani Romi lipint boroitole Konknni bhaxechi koxi udorgot korchi hache vixim ek bhov mhotvachi yevzonn hajir aslolea Konknni bhoktam somor dovorli. Hi yevzonn soglleank avoddli. Toxem asa zalear te yevzonnek fuddem vhoronk Dalgado Konknni Akademik ek Somiti aspachi goroz soglleamni dakhoili. Teach khatir he Akademichi fuddli dixa tharear ghalche khatir ek tatpurti somiti ghoddoun haddli ti oxi asa:

Odheokx: Padr Freddy J. da Costa

Up-Odheokx : Agnelo Pires

Chittnis: Tomazinho Cardozo

Zodd Chitnis: Thomas Fernandes

Bhanddari: Prabhakar Tendulkar

Vangddi: Somplolo Padr. Eusebio Ferrao ani Somplolo Zito Almeida

Budh divpi: Fr. Pratap Naik sj.

He zomatent Dalgado Konknni Akademichi fuddli yevzonn koxi aschi ti tharaili ani tem karya fuddem vhorpak ek Somiti ghoddli hea mhotvachea nirnnoyank lagon 28 Agost 1988 ho dis Dalgado Konknni Akademicho sthapnnecho dis oxem nischit zata.

Mons. Sebastiao Rudolf Dalgado

Mons. Sebastiao Rudolf Dalgado ek vhoddantlo vhodd bhas xastri. Taka zaiteoch bhaso yetaleot. Tea kallar Konknni bhaxe vixim zo tannem vavr kela titlo vavr anik konnech Konknni bhoktan kelo na mhunttlear fott zanvchina. Tachem vhoddantlem vhodd karya mhunttlear don shobdkox – Konkani Portuguese Dictionar, 1893 vorsa ani Portuguese Konkani Dictionar 1905 vorsa. Hea shobdokxam vorvim tannem Konknni bhaxek ek okhondd bunhead ghatli. Punn amchea durdoivan hea mhan monxak Konknni mollar favo to man ani resppeit mell’llo na. Konknniche udorgotichea mollar jem sthan taka favo zaunk zai aslem tem dilem na. Heach khatir, Mons. Sebastiao Rodolfo Dalgado haka man diuche khatir ani tachem nanv Konknni porjechea ontthancher sodanch khellche khatir he Akademik ‘Dalgado Konknni Akademi’ hem nanv dilem.

DKA-cho vavr

Padr. Freddy J. da Costa hachea odheokxponna khal Dalgado Konknni Akademichem karya mottea nettan fuddem ghelem. Romi lipintle Konknnichea bhoktancho ekvott okhondd zalo, Romi lipintli Konknni bhas ek rupan borounche khatir proitn zale ani ghoddoun haddlolea torekvar karyavollink lagon Romi lipintle Konknnicho uzvadd odik ani odik porzollunk laglo. Don tem oddez vorsam DKA-n bhes borem folladik kam kelea uprant Padr Freddy J. da Costa aplea vavrant gul’l zalo. Romi lipi Konknnint tannench porgott kelolea ‘Goycho Avaz’ hea disalleachea vavrant to buddlo ani aplea dusrea dhormik vavrak lagon DKA-chi novi somiti ghoddunk tannem vinonti keli. Tea khatir DKA-chem karya fuddem vhorche khatir novi somiti ghoddli.

Odheokx: Fr. Antimo Gomes

Up-Odheokx: Padr. Planton Faria

Chittnis: Tomazinho Cardozo

Bhanddari: Prabhakar Tendulkar

He somitin poilo toddo kall boro vavr kelo punn uprant Odheokx Padr Antimo Gomes St. Xaviers College hacho Principal mhunn nomiar zalo ani to kolejichea vavrant ocupad urlo. Dusrea ordhan Chittnis Tomazinho Cardozo rajkarnnan poddlo ani Vidhan Sobhecho Sobhapoti zalo. DKA-chea vavracher durlokx zalem. Haka lagon Dalgado Konknni Akademichem karya fuddem vochpachem bondh zalem mhunttlear fott zanvchina.

Onit ani niraxiponn

Dalgado Konknni Akademicho vavr bondh zalolea karannan Romi lipint Konknnint kadambori, mottveo kotha, kovita, lekh, adi boroinnarank mottem luskonn zalem. Tankam kosloch orthik palov mellona zaun tachem sahitya porgott zainastana urlem. Romi lipint Konknni boroitolea – lekhok, kadamborikar, kovi, adi soglleancher vaitt porinnam zalo. Hea boroinnaranchea hangantli ‘creativity’ fugar zaun moronk lagli. Romi lipin Konknni vachpi hozaramni lokank Romi lipint Konknni pustokam vachunk mellona zalim. Sorkaran ghoddloli Goa Konknni Akademi Romi lipintlea sahityak aplo sohokar dina zali. Goa Konknni Akademi-n Devnagori lipintli Konknnichi udorgot korunk zaiteo yevzonneo ankleot punn Romi lipintlea sahityak tantun mat poriant zago naslo. Romi lipintlo Konknni boroinnar niraxi zalolo.

Dusrea vordhan iskolamni bhurgeank Devnagori lipi kottin lagta mhunn Goycho Kristanv somaz Inglezi koddem dhanvonk survat zalea ti bhirant dakoili. Goykar Konknni sorsilo pois ghelear to Konknni osmitayek pois zatolo mhunn monant gombhir vichar bhonvunk lagle. Hea vellar porot ek pavtt Fr. Pratap Naik ani Tomazinho Cardozo bhettle. Hea gombhir vixoya vhoir kholayen niyall kelo. Portun Dalgado Konknni Akademik punorjivont korpachi goroz asa mhunn tankam dislem. Prabhakar Tendulkar hankaim hi yevzonn bori lagli ani te tegui – Padr. Pratap Naik, Tomazinho Cardozo ani Prabhakar Tendulkar ek dis Padr Freddy J. da Costa hankam mellonk ghele. Padr Freddykui ho vichear bhes boro laglo kiteak Romi lipintle Konknnichi poristhiti disan dis bigddot veta tem polloun takai dukh zatali.

Mhotvachi boska

Heach karannank lagon ugddas vechona osli Dalgado Konknni Akademychea vangddeanchi khub vorsamni portun boska apoili. Hi mhotvachi zomat Mayache 12ver 2004 hea disa T. B. Cunha Hall, Ponnje zali. Upott Romi lipintle Konknniche mogi he zomatik hajir asle. He zomatent Fr. Pratap Naik, Fr. Freddy J. da Costa ani Tomazinho Cardozo hannim uloupam korun Dalgado Konknni Akademi portun jivont korpak zai tachim sabar karannam dilim. Soglle ekttovlolea Romi lipint Konknni bhas boroupeanchea tondhancher hanso khellonk laglo. Dalgado Konknni Akademi portun jivont korche korun kosleo kariavolli veginuch hatan gheuncheo hacherui nirnnoy zalo. Padr. Freddy-n te boskechem yezmanponn choloilem ani Tomazinho Cardozo hannem soglleanche upkar attoile.

Padr Freddy-chem moronn

Niktoch Dalgado Konknni Akademichea punorjivitacho liklikit surya udelolo punn avchituch Dalgado Konknni Akademichim pott’ttiddkin Romi lipintle Konknnichi seva korpachim sopnam pisddun ghelolea porim zalim, Dalgado Konknni Akademichea fuddaracher portun kallokh ailolea porim zalo. Mayache 17ver, 2004 hea disa, avchituch eka bhirankull obsoegan Padr. Freddy J. da Costa hea sonvsarak ontorle. Tache borobor anik ek Konknni bhaxecho mhalgoddo Felicio Cardozo hovui somplo. Padr. Freddy-chea mornnan Konknni bhaxek ani odhik korun Romi lipintle Konknni bhaxek vhodd doko dilo. Je umedhin Padr. Freddy J. da Costa hannem Mayache 4 tarker zalole boskent Romi lipichea pattlaudaram bhitor ji umed haddloli ti umed sompli kai oso dubhav poddlo. Punn Romi lipintle Konknni bhaxeche bhokt, somplolea Padr. Freddy-k man diun, Dalgado Konknni Akademi fuddem vhorpak nirnnoy ghetlo.

Tatpurti Somiti

Junache 19ver, 2004 hea disa Dalgado Konknni Akademichea vangddeanchi T. B. Cunha Hall-ant Ponnje portun boska zali. Hea sonkottachea vellar DKA-chem fuddariponn aplea hatamni ghevpak sogllea vangddeamni Tomazinho Cardozo haka vinonti keli. Tomazinho Cardozo hachea fuddariponna khala ek novi ‘tatpurti’ somiti ghoddoili. Ti somiti oxi asa:

Odheokx: Tomazinho Cardozo

Vangddi : Vincy Quadros, Padr. Ave Maria Afonso,

Salvador Fernandes, Cosma Fernandes ani Wilmix

Mazarello, Cipriano Lopes, Padr Peter Raposo, Dr.

Olivinho Gomes, Walter Menezes ani Prabhakar Tendulkar.

Hi tatpurti somiti fokot 6 mhoinea khatir rochloli ani hea 6 mhoinea bhitor Dalgado Konklnni Akademicho sogllo karbar tharear ghalpak zai aslo ani teach borobor Romi lipintle Konknnicheo karyavolli ghoddoun haddunk zai asleo. Thoddeach kalla modem he somitin apleak dilolo to vavr purn kelo. DKA-cho karbar zagear ghatlo, torekvar karyavolli keleot, DKA-k eke kocherichi (office) goroz asli ti goroz Bab Luizinho Faleiro, tednacho Xikxonn Montri, hache koddlean tatpurti kocheri melloun ghetli, ani teach borobor Padr. Pratap Naik hachea sohokaran nond kelole DKA-che 13 ‘Demands’ sorkara ani heram fuddaream somor dovorle. He ‘demands’ oxe asat:

DKA-cheo Magnneo

1. Goa’s Konkani community is divided into two sections, namely those who read and write Konkani in Devanagiri script, and those who read and write Konkani in Roman script. Therefore Goa Government should give equal official status to Konkani written in Roman script along with Konkani written in Devnagiri script. For this the Govt. should amend the Language Act accordingly. The present Language Act,1987 2. (c) reads “Konkani language” means Konkani language in Devanagiri script. We propose the following amendment to 2. (c): “Konkani language” means Konkani language in Devanagiri and Roman scripts. 2. Goa Government recognizes Marathi Akademi as the official Akademi for Marathi in Goa and gives grants. Similarly, Goa Government must recognize Dalgado Konknni Akademi (DKA) as the official Akademi of Konkani in Roman script and give the same amount of grants which the Govt. gives to Goa Konkani Akademi (GKA) and Marathi Akademi. 3. So far, Goa Govt. has not appointed the president of GKA from the writers of Konkani in Roman script. The term of the present GKA president will be completed in the month of November 2005. Hence this time Govt. must appoint the president of GKA from the field of Konkani in Roman script. In the future, Govt. could appoint the president of GKA by turns from Devanagiri script and Roman script promoters alternatively. 4. GKA is a Govt. institution. At present a nominee of the All India Konkani Parishad is the ex-officio member of GKA. GKA Constitution must be amended to include a nominee of Dalgado Konknni Akademi as the ex-officio member of GKA. Goa Govt. appoints three persons eminent in the field of Konkani language, literature or culture as ex-officio members of GKA. While nominating these three persons Govt. should give equal representation to lovers of Devanagiri script and Roman script. 5. In the past Kala Akademi (KA) used to give annual prizes for books published in Devanagari and Roman scripts. For the last many years it has stopped giving awards to books written in Roman script. KA should be ordered to give awards to Roman script Konkani writers, and extend to them the benefits of all other projects and schemes which are available to Konkani in Devanagiri script. 6. Kala Akademi gives Gomantak Sharada Puroskar to Konkani writers in Devanagiri script and Marathi writers only. In future KA must consider and give this prestigious award to Roman script writers and artists as well. 7. Kala Akademi is established to promote the culture of Goa. Hence it should be asked to hold competitions and to promote non-stop Konkani drama, one-act plays in Konkani in Roman script, Mandos, Dekhnnis, Christmas carols, Church hymns, Motets, Intruz khells, Kantaram, Kunbi songs and dances, and other folk arts. 8. Govt. must name its new theatre for the performing arts in Margão, in honour of late João Agostinho Fernandes, who is popularly known as “Pai Tiatrist”. By doing this Govt. will honour a great Goan tiatr stalwart and his minority community. 9. Tiatr is the most popular form of theatre in Goa. To promote this local art form Goa Govt. should make available its theatres in Panaji, Ponda and elsewhere at subsidized rates.This generous gesture of the Govt. will boost the tiatr industry. 10. Goa Konkani Akdemi, Kala Akademi, Directorate of Art and Culture, Directorate of Information and other Govt. departments while publishing Konkani books, should publish them in both Devanagiri script and Roman script. 11. In school syllabus, lessons of writers of Roman script Konkani must be given equal representation without changing the language and style. In colleges and universities, the syllabus should include Konkani literature written in Roman script. 12. Konkani has two representatives in Sahitya Akademi, New Delhi. Goa Govt. sends three names to Sahitya Akademi as its nominees. Let the Goa Govt. send names of Devanagiri writers and Roman script writers by turns. 13. To promote Konkani films the Govt. must establish a separate board of films consisting of writers, artistes and experts in film making. This board too must have equal representation as demanded in all other cases

He ‘demands’ gheun Mukhel Montreak ani sogllea Montreank ami mell’lle ani Romi lipintle Konknni bhaxek nit diyat mhunn maglem. Hea ‘demands’-ancho boro porinnam zalo mhunnchem Vidhan Sobhent ek ‘Resolution’ pas kelem zache vorvim Romi lipintle Konknni Bhaxechi-i udorgot korunk Goa Konknni Akademi-k sorkaran adex (direction) dilo. Tea adexa uprant Goa Konkani Akademi Romi lipintlea sahitya porgott korche khatir orthik adhar diunk survat keli.

Portun durdoxea

Tomazinho Cardozo hachea fuddariponna khal aslole tatpurte somitiche kall somplea uprant Agostache 31ver, 2005 hea disa DKA chi novi somiti vinchun kaddli. Konnachoch virodh nastana ek motan Wilmix Mazarello hachea fuddariponna khal novi somiti ghoddoili. Hi somiti oxi asa:

Odheokx : Wilmix Mazarello

Up-Odheokx : Cipriano Lopes

Chittnis : Michael Gracias

Bhanddari: Rupesh Jogle

Vangddi: Jose Salvador Fernandes, Vincy Quadros, Cosme Fernandes.

Poilea toddea mhoineamni he somitin Romi lipi Konknni bhas chollvoll fuddem vhorpak kaim bore nirnnoy ghetle. Punn durdoivan, thoddeach kalla bhitor, Odheokx Wilmix Mazarello ani Chittnis Michael Gracias hanche modhem kaim goirsomoz utpon’ zalo ani DKA-chea vavracher motto vaitt porinnam zalo. DKA-cho vavruch bondh zalo mhunttlear fott zanvchina. Dalgado Konknni Akademicher porot vaitt dis ailolea porim zalem.

DKA-chi Novi Somiti

DKA-chea vangddi guspaghonddolan poddle. DKA-chi sabar boska apounchi mhunn magnni keli. Akhrek Romi lipintle Konknnicho ek borem magpi, Shri. Minguel Braganza, Mapxencho hanchea proitna vorvim 25 Febrer 2007 hea disa Dalgado Konknni Akademichi sabar boska Institue Menmezes Braganza hea hall-an apoili. Sobhek zaite Konknni mogi hajir zale. Hi Akademi portun tharear ghalche khatir ek motan portun Tomazinho Cardozo hachea odheokxponna khal novi Somiti venchun kaddli. Tache vangddi oxe asa:

Odheokx : Tomazinho Cardozo

Up-Odheokx: Premanand Lottlikar

Chitnis: Jose Salvador Fernandes

Bhanddari : Prabhaker Tendulkar

Vangddi: Thomas C Fernandes ani Teotonio Pereira.

Digamber Kamat sorkaracho adhar

Anik ek pavtt Tomazinho Cardozo hachea odheokxponna khal DKA-chea karyavollink nett dilo. Dudvanchi goroz asli tednam Dalgado Puroskar bhettounche khatir Padr Pratap Naik ani Padr Conceicao D’Silva hannim duddvancho adhar dilo. Teach borobor Sorkara lagim DKA-k orthik anudhan diunk ‘demand’ kelo. Amchea borea noxiban Digamber bab Kamat Goycho Mukhel Montri zalo. Amcheo soglleo oddchonneo ani to 13 sutri ‘demand’ portun Digamber bab Kamat hanche somor manddlo. Digamber bab Kamat hannem aplea lagim ghoddta to adhar amkam basailo. Hea proitnachem foll mhunnlear Digamber Kamat hannem amchea ‘demand’-antle kaim ‘demands’ mandhun ghetle.

1. Dalgado Konknni Akademik vorsachea vorsa 15 lakh rupiancho orthik adhar diunk ‘Budget’-an tortud keli. 2. Modgavant bandlolea Ravindra Bhavan hachea mukhel vosreak Pai Tiatrist Joao Agostinho Fernandes hachem nanv dilem. 3. Tiatr Akademi Goa hichem sthaponn kelem.

Romi lipintle Konknni bhaxecher bore dis udeonk lagle.

Borem karya

Dezembrache 16ver 2008 vorsa Dalgado Konknni Akademichi novi somiti vinchun kaddche khatir DKA-che Ghottne pormonnem venchnnuko jahir keleo. Hea venchnnukamni konnachoch virodh nastana Premanad bab Lotlikar hachea fuddariponna khal novi somiti vinchun kaddli. Hi somiti oxi asa:

Odheokx: Premanand Lotlikar

Chitnis: Jose Salvador Fernandes

Bhanddari: Thomas C Fernandes

Vangddi: Tomazinho Cardozo, Boaventure D’Pietro, Prabhakar Tendulkar ani Teotonio Pereira.

Premanand Lotlikar hachea odheokxpoda khal Dalgado Konknni Akademi-n torekvar karyavolli ghoddoun haddleo. Heach vellar sorkarachem 15 lakh rupianchem orthik onudanui DKA-k mellpak suru zalem. DKA, ji adim duddu na mhunnon aplo vavr fuddem vhoronk addkolltali, hem sorkari onudhan yeun DKA-chi bunhead okhondd zali. DKA Romi lipintle Konknni bhaxechi charui vattamni udorgot korunk yesesvit panvllam marlim.

Dusre pavtt Odheokx

Premanand bab Lotlikar hachem tin vorsanchem karya bhes borem kelea uprant Janerache 30 tarker, 2011 hea disa DKA-chi novi somiti ghoddpak portun vennchnnuk zali. He boskent Premanand bab Lotlikar hankam portun DKA-cho Odheokx zaunk vinchun kaddlo. He somitiche vangddi oxe asa:

Odheokx : Premanand Lotlikar

Up-Odheokx: Prince Jacob

Chittnis: Jose Salvador Fernandes

Bhanddari: Walter Menezes

Vangddi: Tomazinho Cardozo, Tarkeshwar Naik, ani Bonaventure D”Pietro.

Premanand bab Lotlikar hachea fuddariponna khal DKA-cho vavr nettan fuddem ghelo. Chittnis Jose Salvador Fernandes ani Bhanddari Walter Menezes hancheim promannik yogdan DKA-k lablem. Umedhin ani mogan DKA-cho vavr fuddem veta tem soglleank disonk ailem. Hech somitichea margdorxonna khal DKA-chea Rupea Utsovi vors somorombhlem.

Tisre pavtt Odheokx

DKA-cho Odheokx hea natean Premanand Lotlikar hannem aple don karyakall (terms) zoitivontponnim sompoilea uprant anik ek pavtt DKA-chi novi somiti ghoddoun haddpak venchnnuko zaleo. Premanad Lotlikar hannem ani tache somitin bhes borem karya kelam dekhun tannem portun DKA-cho Odheokx zauncho mhunn vangddeamni taka vinonti keli. Vangddeanchi vinonti svikarun Premanand Lotlikar portun venchnnukek ubo ravlo ani motte sonkhen motam melloun Odheokx pod jiklo. Premanand Lotlikar DKA-cho tisre pavtt odheokx zalo. Hi venchnnuk ------------------ disa zali.

Novean venchun ailoli DKA-chi somiti oxi asa:

Odheokx : Premanand Lotlikar

Up-Odheokx: Fr. Conceicao Silva

Chittnis: Vincy Quadros

Bhanddari: Walter Menezes

Vangddi: Tomazinho Cardozo, Alfonso Braganza, Daniel D’Souza, Pandirinath Lotlikar, Anthony Miranda, Vassalo Carvalho, Pio Esteves ani Selza Lopes

Copyright © 2016 DKA Crafted by Deviant Strokes